ورلڈ کپ میں بھارت سے میچ کا انتظار ہے، فخر زمان

لاہور: قومی کرکٹ ٹیم کے اوپنر فخر زمان نے کہا ہے کہ ورلڈ کپ میں بھارت کے ساتھ میچ کا انتظار ہے اور میں کوشش کروں گا کہ ایک اور سنچری بناکر پاکستانی ٹیم کو جیت دلاؤں۔

قذافی اسٹیڈیم لاہور میں پریکٹس سیشن کے دوران ایکسپریس نیوز سے بات کرتے ہوئے فخر زمان کا کہنا تھا کہ انہیں پہلا ورلڈ کپ کھیلنے کا کوئی پریشر نہیں وہ ورلڈ کپ کے لیے بھرپور تیاری کے ساتھ جارہے ہیں۔ انگلش کنڈیشنز میں اس سے پہلے کھیلنے کا تجربہ ہے، آئی سی سی چیمپئنز ٹرافی کے ذریعے انہیں پہچان ملی تھی۔ اس بار بھی کوشش ہوگی کہ پاکستانی ٹیم کو اچھا آغاز فراہم کرکے اس کی فتوحات میں اہم کردار ادا کروں۔

پاک بھارت ٹاکرے سے متعلق فخر زمان کا کہنا تھا کہ انہیں ورلڈ کپ میں بھارت کے ساتھ میچ کا انتظار ہے۔ کوشش کروں گا کہ ایک اور سنچری بناکر پاکستانی ٹیم کو جیت دلاؤں اور عوام کو خوشیاں منانے کا موقع دوں۔